«Դեպի Սվանը» ֆրանսիացի նշանավոր վիպասան Մարսել Պրուստի (1871-1922) «Կորուսյալ ժամանակը որոնելիս» վիպաշարի առաջին վեպն է: Լույս է տեսել 1913 թ.: «Դեպի Սվանը» համադրում է այսպես կոչված՝ խոստովանական վեպի և հուշագրական վեպի տարրեր, որտեղ անցյալն ու ներկան, միահյուսվելով միմյանց, բացահայտում են մարդկային մտքի զարմանալի ու անվերջ շարժումը դեպի ներս, դեպի ներաշխարհի խորքերը: Ներկան և անցյալը, խորհրդածությունն ու հիշողությունը հայտնվում են ժամանակից դուրս և միավորվում մեկ պատկերի մեջ՝ ձևաբանելով այսպես կոչված «գիտակցության հոսք»: