Այս պատմությունն ընդգրկում է դեպքեր, դրվագներ, որոնք, կատարվել են փոքրիկ մեր երկիր Հայաստանից, Վարդենիսից ու նրա Մեծ Մասրիկ գյուղից մինչև Միացյալ Նահանգներ, այնտեղից Ռուսաստան, Մոսկվա: Զրկանք, տառապանք, բանտ ու կալանք, անմեղ մարդկանց տասնվեց տարիներով ազատազրկում: Դեպքեր որբանոցում մեկ տարեկան դարձած ու որդեգրված աղջկա կյանքից: Աղջիկ, որն ապրել է սկզբից խաղաղ, լավ կյանքով, ապա տարօրինակ պահվածք է ձեռք բերել՝ չարություն, գողություն, անառակության փորձեր նույնիսկ: Ապա շեշտակի շրջադարձ կյանքում: Կարծես ի վերուստ ստացած նոր լուսավոր պահվածքով, գլխիվայր շուռ եկածի նման. ինչպես ասում են՝ իր լույսը սփռել է ամենուր, հարազատներին՝ հեռվից ու մոտիկից միավորող մի լուսասյուն դառնալով: Իսկ աղջկան այդպես ներկայացրել և մեծարել է հունահայ ծագումով տղամարդը՝ գրքի մյուս հերոսը՝ Հուլիոսը: