Նոր գրքեր բուկինիստում

29.10.2020 Նոր գրքեր բուկինիստում

Եթե դուք ակտիվորեն հետևում եք հայաստանյան գրական անցուդարձին, ապա այս նորությունը հենց Ձեզ համար է: Ձեզ ենք ներկայացնում շարք, որով կներկայացնենք վերջին շաբաթում լույս տեսած և մեր գրախանութներում առկա գրքերի ցանկը:

1. Լուսինե Խառատյանի «Անմոռուկի փակուղի» ժողովածուում ընդգրկված պատմվածքները մեկ թեմատիկ ամբողջություն են և միմյանց լրացնելով՝ վեր են հանում ազգային ինքնության, բարդույթների, ազատությունների սահմանափակման բարդ և հակասական բազմաթիվ հարցեր, որոնք ներփակ տարածականության մեջ խտանալով՝ վերածվել են ազգային հոգեվիճակի: Խոսելով ու պատմելով «անմոռուկի բարդույթի» և «երևանյան հիվանդության» տիպիկ համախտանիշների մասին՝ հեղինակը հնարավորություն է տալիս բացել սահմանները, դուրս գալ փակուղուց և տեսնել «սարի հակառակ կողմի» արտապատկերը:

2.XXI դարի 21 դասերը

Հարարին այս գրքով առաջ է քաշում բազմաթիվ կարեւոր հարցեր, որոնց պատասխանները պետք են մեր գոյատեւմանը: Մեր անցյալն ու ներկան հասկանալու ճանապարհին Հարարին ստիպում է մտածել արժեքների եւ իմաստի մասին, հասկանալ, թե ինֆոաղմուկով եւ անորոշությամբ լի այս աշխարհում ո՛րն է մեր առաքելությունը:

- Ի՞նչ է իրականում կատարվում այս պահին:

- Որո՞նք են այսօրվա մարտահրավերներն ու այլընտրանքները:

- Ինչի՞ն պետք է ուշադրություն դարձնենք:

- Ինչպե՞ս են համակարգիչները եւ ռոբոտները փոխում մարդ լինելու իմաստը:

- Ինչպե՞ս ենք դիմակայում կեղծ լուրերի համաճարակին:

- Ազգերն ու կրոնները դեռ կարեւո՞ր են:

- Ի՞նչ պետք է սովորեցնենք մեր երեխաներին:

21 գլուխներում, որոնք եւ՛ դրդում են ընդվզել, եւ՛ մտածելու տեղիք են տալիս, Հարարին, շոշափում է բազմաթիվ խնդիրներ։ Ինչպե՞ս կարող ենք պահպանել ընտրության ազատությունը, երբ Մեծ տվյալները հետապնդում են մեզ: Ինչպիսի՞ն է լինելու աշխատանքային շուկան ապագայում, եւ ի՞նչ հմտություններ են պետք դրանից չարտամղվելու համար: Ինչպե՞ս պետք է պայքարենք ահաբեկչության սպառնալիքի դեմ: Ինչո՞ւ է լիբերալ ժողովրդավարությունը ճգնաժամ ապրում:

3. Ղամբարյան Ա. "Լռությունը Իրավունքում "

Մենագրությունը նվիրված է իրավական նշանակություն ունեցող լռության համատեսական և քրեադատավարական տեսանկյուններին: Աշխատանքի առաջին բաժնում ներկայացվում են լռության համատեսական հարցերը, մասնավորապես քննարկվում են ՝ լռության իրավական ռեժիմները և լռությունից բխող պայմանական եզրահանգումները: Աշխատանքի երկրորդ բաժինը նվիրված է քրեական դատավարությունում լռության հարցերին, մասնավորապես քննարկվում են՝ լռությամբ դատավարական իրավունքներից հրաժարվելու, լռությամբ մեղքն ընդունելու, լռությամբ քրեական հետապնդումը դադարեցնելու համաձայնություն տալու, ինչպես նաև քննիչի լռության հարցերը:

4. Օնորե դը Բալզակ "Շանգրենի կաշին"

Բալզակը այս վեպը անվանել է իր գրական ճանապարհի «ելակետը»: Վեպում մարդկային ընչաքաղցությանը հակադրվում է կյանքի անցողիկությունն ու սիրո հավերժականությունը:

5. Վարդգես Պետրոսյան՝ «Հայկական էսքիզներ»

Գրքում միահյուսված են պատմվածքը, նովելը, վավերագրական արձակը, հրապարակախոսական խորհրդածությունները: Գրողը փորձում է նկատել և իմաստավորել մեր ժողովրդի կյանքի ու բնավորության նոր երևույթներ, պարբերաբար հետադարձ հայացք նետելով մեր պատմության հեռու և մոտիկ խաչմերուկներին:

6. Բևերային արջուկը

Քաջարի ու հնարամիտ բուեռային արջուկ սպիտակամորթ Լարսն ապրում է ձյունով ու սառույցով շրջապատված իր աշխարհում: Սակայն երբեմն այդ աշխարհը ձանձրալի է թվում բևեռային արջուկին, ու նա գնում է հեռուներ: Ահա այդպես էլ սկսվում են նրա արկածները: Լարսը բազմաթիվ փորձություններ է հաղթահարում, ծանոթանում ու ընկերանում է տարբեր կենդանիների հետ, օգնում է նրանց, որ գտնեն իրենց ծնողներին: Իսկ հետո բարի ու ամենահաս արջուկը կարոտով լի վերադառնում է իր տուն՝ ծնողների մոտ:

7. Նարեկ

10-րդ դարի խոշորագույն բանաստեղծ Գրիգոր Նարեկացու «Մատյան ողբերգության» («Նարեկ») պոեմը բանաստեղծի սրտի խոսքն է, աղոթքը, ներքին մենախոսությունը՝ ուղղված երկնային տիրոջը՝ բարձրյալին: Կազմված է ավելի քան 10 000 տողից: Պոեմի հատվածները լույս են տեսել դեռևս 1513 թվականին Վենետիկում: Ամբողջությամբ հրատարակվել է 1673 թվականին Մարսելում։