+ Ավելին
բաժին

8 բուկինիստական խորհուրդ

11.08.2017 8 բուկինիստական խորհուրդ

Books.am-ի առանձնացրած այս 8 խորհուրդները կօգնեն ընթերցանությունը դարձնել ավելի օգտակար ու հաճելի: Գրի՛ առեք, մտապահե՛ք և կիրառե՛ք:

1.Ձեռք բերեք գրքի համար նախատեսված հենարան:

Այս խորհուրդը գործում է թե՛ էլեկտրոնային, թե՛ թղթե գրքերի համար: Բացի նրանից, որ սա ընթերցանությունն ավելի հարմար դարձնող իր է, այն նաև կարող է լինել գեղեցիկ ու հետաքրքիր հավելում՝ պատրաստված սեփական ձեռքերով կամ գնված գրախանութից: Հարմար հենարանն ազատում է ձեռքերը, ինչի հաշվին հնարավոր կլինի ավելի երկար կարդալ: Բացի այդ, անշարժ դրված գրքից ավելի հարմար կլինի կարդալ՝ առանց լարելու աչքերը:

 

2. Օգտագործեք ականջակալներ:
Առանց բառերի երաժշտությունը կօգնի կենտրոնանալ ու հաճույք ստանալ ընթերցանության ողջ ընթացքից:Համացանցում գտեք ու կազմեք ընթերցանության համար անձնական երաժշտացանկ:
Եթե սիրում եք կարդալ կատարյալ լռության պայմաններում, սակայն գտնվում եք աղմկոտ վայրում, ապա կարող եք դնել ականջակալները, բայց երաժշտություն չմիացնել: Այս մեթոդը ո՛չ միայն կխլացնի շրջապատի աղմուկն, այլև կհուշի տարածքում գտնվողներին, որ զբաղված եք:

 

3. Համապատասխան կայքերում կիսվեք գրքից ստացած տպավորություններով ու տեսակետով:
Այս տարբերակով ոչ միայն կօգնեք այլ մարդկանց գրքի ընտրության հարցում, այլև կվերհիշեք կարդացածը՝ ամրապնդելով այն:

4. Եթե  Ձեզ դուր է եկել գրքում կարդացած որևէ միտք, մի շտապեք  գրի առնել այն, փորձեք հիշել:
Հաճախ է պատահում, որ գրքում հանդիպած մտքերն այնքան ենք հավանում, որ միանգամից գրի ենք առնում: Մեզնից ոմանք նույնիսկ ունեն նման մտքերը գրանցելու  համար նախատեսված հատուկ տետրեր: Ձեռքը դեպի նոթատետրը տանելու փոխարեն՝ աշխատեք միանգամից մտապահել խոսքերը: Հորինեք իրավիճակներ, որոնց դեպքում կկարողանաք կիրառել դրանք:


5. Կապեք կարդացածն այն ամենի հետ, ինչն արդեն գիտեք:

Այս մեթոդը կօգնի ավելի լավ մտապահել կարդացածը: Նոր ինֆորմացիան արդեն իմացածի հետ կապելն ավելի էֆեկտիվ կլինի, քան ուղղակի նոր տեղեկություն ներբեռնելը:

6.Նշումներ արեք ազատ հատվածներում:
Աշխատեք նշումներ անել գրքի ազատ դաշտերում. դա կօգնի հետագայում ավելի արագ վերհիշել կարդացածը:


7. Ձեռքի տակ տարբեր ժանրերի գրքեր ունեցեք:

 Երբեմն ցանկություն է լինում կարդալ ֆիզիկայի օրենքների մասին, երբեմն էլ՝  հեքիաթների որևէ գիրք. միշտ պետք է պատրաստ լինել տրամադրության կտրուկ փոփոխություններին:

 

8. Անջատեք ուղեղի ձայնը:

Մենք խոսել ենք սովորել բառերը բարձրաձայն կրկնելու միջոցով։ Դա է պատճառը, որ շատերի մոտ կարդալու այդ մեթոդը կիրառվում է նաև հետագայում: Ահա, թե ինչպես է դա պատահում. մենք տեսնում ենք բառը, բարձրաձայն կամ մտքի մեջ կարդում ենք այն ու միայն դրանից հետո ենք ընկալում: Բայց այդ գործընթացը շատ ժամանակատար է ու ոչ էֆեկտիվ: Առավելագույն արդյունավետության հասնելու համար սկսեք կարդալ հայացքով ու միաժամանակ մտքի մեջ հաշվեք: Կարևոր է, որ հաշիվը լինի առանց դադարների ու հստակ: Սահեցրեք հայացքը տեքստի վրայով ու յուրաքանչյուր պարբերության վերջում ստուգեք, թե ինչ մտապահեցիք: Սկզբում դժվար կլինի, բայց մի քանի փորձից հետո կհաջողեք:

բաժին